葡萄牙文化知識 - 葡國擔遮會嚇親人？

葡國擔遮會嚇親人？

近排澳門天氣開始熱，喺街上都見到好多人換上短袖衫，而且仲唔難見到夏天嘅防曬神器：雨遮！

喺澳門，無論晴天、陰天定雨天都會見到路人擔遮嘅身影，但大家又有冇諗過呢樣咁普遍嘅習慣喺其他地方可能係一件令人覺得好奇怪嘅事？

講緊嘅其實就係葡國人係唔習慣擔遮架！當然好多歐美人士都係。

今日，不如等我哋一齊黎傾傾擔遮這回事啦！😊

首先，我哋講講晴天擔遮嘅習慣啦，身為亞洲人嘅我哋，傳統觀念都會希望皮膚越白越好，正所謂一白遮三醜，好多亞洲女性都會盡量避免曬黑而做好多防曬裝備先出門

但原來歐洲人同我哋嘅諗法係相反架，佢哋嘅審美觀會覺得將白皮膚曬黑少少比較靚，所以佢哋會諗盡辦法將自己曬成古銅色。特別係喺夏天嘅時候，葡國人好鍾意去沙灘曬太陽，而且仲會搽啲可以曬黑嘅防曬油，務求將自己曬得更黑。😂歐洲人嘅諗法係咪同我哋好唔同呢。

文化差異呢樣嘢真係好難改變，如果一個怕曬黑嘅遊人去到歐洲旅行全程都擔住把遮會有咩事發生？

試想像一下大家身處喺一個風和日麗嘅葡國大街上，大家都著晒吊帶衫或短褲享受陽光嘅時候，突然見到有人擔著把遮躲避太陽其實真係會好出眾，甚至可能會有個葡國人走上前問當事人點解無落雨都要擔遮，就算無人問都好，好多時候都會有好多奇異嘅目光投射去擔遮人身上，到最後擔遮嗰個人就算幾唔怕尷尬都好，都會因為路人嘅眼光而投降放低把遮😂。唔知大家有無試過呢種經歷呢？