葡萄牙文化知識 - 葡式麵包好難食？

葡式麵包好難食？

喺澳門，我哋食開嘅麵包基本都係日式麵包，佢嘅口感多數比較鬆軟、富有空氣感，除咗做代餐仲可以當甜品、點心或者零食。

不過，歐式嘅麵包就有啲唔同啦，相信大家第一個反應都係覺得歐式麵包好硬。呢個其實係歐式麵包嘅特點，因為歐式麵包比較著重原材料，特別係小麥嘅味道，所以雞蛋、牛奶同牛油嘅比例唔會太多，食完一定會飽感十足，難怪好多人都話窮遊歐洲一定唔少得食麵包🤣。

講到食麵包，梗係唔少得葡式麵包啦，今日一於等我哋介紹返幾款喺澳門都食到嘅葡式麵包比大家啦！

葡式臘腸麵包（Pão com chouriço）

聽個名就知係葡式臘腸同麵包嘅組合啦，當麵包新鮮出爐，你一口咬落去嘅時候，麵包外脆內軟，臘腸嘅香氣同肉汁充滿口腔，咬多兩啖仲會有好強烈嘅臘腸鹹香味，簡直係好味到上咗天堂，完全係下午茶之選啊！

粟米麵包（Broa）

粟米麵包唔係有粟米粒嘅麵包，而係主要用黃色或者白色粟米粉整成嘅包。呢款麵包非常厚重紮實，除咗外皮脆口，內部口感濃密同濕潤，可以用黎做餐前包，再配埋橄欖油同橄欖一齊食。不過，呢款粟米麵包嘅歷史就有啲慘慘豬喇，因為以前小麥粉係好貴嘅原材料，只有富有先食得起用小麥粉整嘅麵包，而窮人就只主要食粟米粉整嘅麵包，所以呢款包以前成日都會同窮人連繫起來。不過，到咗今時今日當然冇人會咁諗喇。